??runn Traustad?ttir

2003-09-11T14:26:00.000Z

hg hghjg hjgh gj hg hgg gg

2003-06-15T22:47:00.000Z

Ég ætla að segja ykkur frá skrítinni reynslu sem ég varð fyrir í dag. Eftir að hafa hjólað rúmlega 30 km (alltaf að æfa mig) ákváðum við hjónin að fara út í kikjugarð með nokkur sumarbljóm. Eins og stundum áður var ég eitthvað utan við mig og þegar ég fór út út bílnum missti ég veskið mitt án þess að taka eftir því. Það var ekki fyrr en við vorum komin úr garðinum og ætluðum að fara að versla að ég áttaði mig á þessu. Ég dreif mig út í garð og leitaði en fann ekki veskið. OK, það var slæmt en ekkert við því að gera. Rúmum klukkutíma seinna kom heim til mín maður sem ég hafði tekið eftir í garðinum og réttir mér kortin mín, ökuskírteinið og veskið. Hann sagðist hafa fundið þetta í ruslatunnu sem var við hliðina á þar sem við lögðum. Ég er manninum óskaplega þakklát. En það sem mér fannst svo leiðinlegt var að sá sem fann það henti því í ruslið með öllum mínum kortum og skilríkjum eftir að hafa hirt peningana úr því (það er svo sem ekkert við því að segja, ég hafði með sjálfri mér ákveðið að gefa þá í fundarlaun ef veskið kæmi til skila) en afhverju að henda því í ruslið - næsti póstkassi hefði eflaust komið veskinu til skila.
Nú er ég annars að berjast í gegnum grein 2 frá Stefáni, ég get nú ekki neitað því að mér finnst hún óþarflega löng, en það er svo sem ok að lesa hana. Ég hef eytt drjúgum tíma í það að lesa lokaverkefni samnemenda minna frá námskeiði Salvarar og ég verð að segja að mér finnst þau alveg frábær. Ég vona svo sannarlega að þau verði aðgengileg á vefnum næstu vetur. Ég hef samt smá áhyggjur af tengingum eftir að FMR tekur yfir ísmenntarsvæði Reykjavíkurkennara. Vonandi uppfærir Salvör slóðirnar ef við sendum henni línu:-)

2003-06-12T00:52:00.000Z

Nú er langt síðan ég hef skrifað, en ég var rétt í þessu að átta mig á enn einni tegundinni af heimasíðu. Hún er inni á Webordsvæðinu hans Stefáns og ég er nú búin að fatta nokkur trix sem hægt er að nota, en ég veit ekki slóðina að minni eigin síðu. Kannski er engin slóð:-(
Mikið vildi ég nú annars að við værum en með vinnusamninga eins og áður fyrr, það er alveg ótrúlega leiðinlegt að vera að mæta í skólann og vinna þar nánast út júní. Þar fer allur sjarmi af þessu starfi. Mér fannst alltaf gott svarið sem einhver notaði þegar hann var spurður af því hvers vegna hann vildi gerast kennari - júní, júlí, ágúst.

2003-06-03T00:01:00.000Z

Jæja, þá var það skólinn aftur í dag. Ég er nú ekki alveg búin að átta mig á því um hvað þessi kúrs á að fjalla, þegar ég las lýsinguna á honum skildi ég hana þannig að við ættum að velta fyrir okkur kennsluforritum frá öllum hliðum, en nú er ég ekki viss. Eftir hádegið fórum við á fyrirlestra vestur í Háskóla. Þar talaði m.a. Finni sem mér fannst gaman að hlusta á, mikið vildi ég fá að fara í skólaheimsókn til Finnlands og sjá hvernig þeir fara að í UT kennslu.
Í gær afrekaði ég að koma videó mynd í fyrsta skifti út á vefinn. Mér finnst hún reyndar dálítið þung enda notaði ég ekki Producer, kannski léttir hann svona myndir eitthvað, hvað veit ég. En það er gaman að þessu og ég er sko ekki hætt!!
Ekki má nú alveg gleyma menningunni. Í kvöld fór ég á tónleika í Hallgrímskirkju þar sem norsku kvartet söng lög frá 900 ára tímabili, þeir voru magnaðir. Seinni hluta tónleikanna sungu Fóstbræður með þeim og voru góðir að vanda:-)

2003-05-27T22:23:00.000Z

Ég er nánast með fráhvarfseinkenni, ekkert blogg í heila viku. Nú leggst ég bara á hnéin út í mold, þegar ég kem heim á daginn og hugsa ekki einu sinni um að kveikja á tölvunni. Þetta er dálítið skrítið, en líka afslappandi.
Held ég fari bara aftur út í moldina - en hlakka nú samt til að hitta skólafélagana í næstu staðbundnu lotu.

2003-05-18T20:40:00.000Z

Jæja, ekki er nú hægt að hætta blogginu þó svo námskeiðið sé búið. Mér finnst í raun og veru að nokkrir í hópnum séu orðnir stór vinir mínir vegna þess að ég hef fylgst svo vel með þeim á blogginu. Þannig að ef bloggið leggst af þá mun ég sakna vina:-)
Í gær tókst mér að setja tónlist við tvær síður á vefnum mínum um Háaleitishverfið . Reyndar hef ég þá kenningu að maður eigi ekki að vera að hlaða inn tækniatriðum bara af því maður kunni það en þetta er svona sárabót vegna þess hversu seint mér gengur að vinna við PowerPoint og Producer.
Þetta hefur annars verið viðburðarík helgi með miklum matarboðum og tilheyrandi rauðvíns.... Í morgun keyrði ég svo son minn út á flugvöll en hann var að fara í skólaferð til Laos og Thailands. Þetta verður vonandi skemmtileg ferð hjá honum en móður hans finnst þetta dálítið langt á þessum ófriðartímum.
Í dag fór ég svo á tónleika hjá Drengjakórnum í Neskirkju. Tónleikarnir voru nokkuð skemmtilegir, þar var m.a. einn lítill drengur Ísak Ríkharðsson sem söng einsöng af miklum krafti. Þá frumflutti kórinn tvö verk sem höfðu verið samin fyrir þá.

2003-05-15T23:54:00.000Z

Í dag tókst að taka video inn með producer, nú verður spennandi að reyna við framhaldið.
Ég hef nú dálítið gaman af því að nemendur mínir sem útskrifuðust fyrir 10 árum ætluðu að setja upp blogg í tilefni 10 ára útskriftarafmælis síns. Ekki gekk það alveg nógu vel hjá þeim og þessar elskur höfðu samband við gamla tölvukennarann og spurðu hvort ég gæti hjálpað. Ég var ákaflega stolt og snaraði upp fyrir þau bloggsíðu með gestabók og teljara. Það er gaman að þessu af því mér finnst þetta kannski vera hluti af unglingamenningu og þó alveg sérstaklega háskólanema. Vinkonur mínar skilja allavega ekki hvað það er að blogga.
Annað mál, ég var að skoða bloggsíðu í dag sem heitir katrin.is, hún er alveg ótrúlega flott uppsett, ég sá að við eigum margt ólært í þessum fræðum sem og öðrum.

2003-05-14T22:36:00.000Z

Ég held bara að ég sé tilbúin með vefinn minn um Háaleitishverfið, auðvitað er það þannig að ég gæti unnið við hann í nokkrar vikur í viðbót og ég mun örugglega bæta við hann í framtíðinni - en ég ætla ekki að gera meira núna og set hér punktinn.
Það eina sem ég held að ég eigi enn ólokið er að færa video inn á powerpoint en ég veit bara ekki hvernig ég fer að því og það eru hvergi leiðbeiningar um það. Mér fannst stór sigur að koma videomyndinni inn á tölvuna mína.
Þetta fer allt einhvern veginn, nú verð ég að einbeita mér að nemendum mínum og útbúa prófinn. Strákarnir mínir eru báðir að klára prófinn á morgun svo ég ætla að hafa smá veislu úr því við erum öll að klára á sama tíma.
Mikið held ég að framhaldsskólakennarar séu með miklu betri samninga en við grunnskólakennarar. Ætli maður fái ekki réttindi til þess að kenna í framhaldsskóla eftir þetta nám? Það er nú meiri roluskapurinn að hafa ekki einu sinni kynnt sér hvaða réttindi þetta nám gefur.

2003-05-14T00:11:00.000Z

Ég var nú svo heppin í dag að einn af þessum ágætu tölvumönnum frá FMR kom til mín og hjálpaði mér við að setja upp firewirekortið í tölvuna mína. Það var nú eins gott því þetta var nú ekki bara plug and play eins og sagði á kassanum. En nú er ég semsagt komin með videoupptöku inn á tölvuna og þá er að klippa hana aðeins til og síðan, já síðan að sameina hana við PowerPoint. Það veldur mér verulegum áhyggjum að vídeotakan færi líklega á þrjá geisladiska, ég hef ekki hugmynd um hvernig ég get þjappað eða á hvaða formati ég á að vista. Please ef einhver þarna úti veit hvað á að gera væri frábært að heyra frá þeim sama það er alveg ofboðsleg vinna að lesa í gegnum allar leiðbeiningarnar.

2003-05-12T21:15:00.000Z

Alltaf er maður eitthvað að potast. Eftir kennslu í dag lokuðum við Sigga tölvustofunni, settum stafrænu vídeóvélina á þar til gerðan fót og tókum upp kynningu við PowerPoint verkefnið. Ég óttast reyndar að ef ég mundi sækja um þularstarf við sjónvarpsstöð, þá gæti ég ekki notað þessa upptöku sem dæmi um færni mína - en ég held ég láti hana duga svona sem fyrstu tilraun. Það kom auðvitað í ljós þegar við ætluðum að flytja myndina yfir í tölvuna að það vantaði firewire kort í tölvuna, ætli þeim sem mættu á síðust staðbundnu lotu hafi verið kennt þetta. Jæja, ég var sem sagt búin að kaupa firewire-snúru úr videó í tölvuna, en kortið vantaði. Ég fór þá í Office One og keypti kort sem ég ætla að setja í vélina mína (okkar) á morgun og vona það besta, það stendu allavega á kassanum plug and play.
Það er nú meira hvað fólk er eitthvað hjálplegt. Ég skrifaði til strætó í morgun og var að spyrja hvort þeir ættu nokkrar myndir af strætó síðan um 1960, ég fékk svar undireins frá Þórhalli Halldórssyni sem bauðst meira að segja til þess að koma með þær til mín. Ótrúlegt. Ég skrifaði Mál og menningu líka fyrir nokkrum dögum vegna mynda sem mig vantaði og þeir hringdu strax í mig og voru ekkert nema almennilegheitin. Ég verð eitthvað svo glöð þegar fólk er svona gott:-)

2003-05-11T23:38:00.000Z

Búin að sitja í allt kvöld við tölvuna. Það er nú meira hvað fínpússningar geta tekið langan tíma. Nú er þetta allt að smella og vonandi halda tímamörkin þ.e. 15. maí. Það verður gott að geta einbeitt sér að vinnunni og átt dálítið frí með góðri samvisku:-)

2003-05-10T18:40:00.000Z

Þetta er búinn að vera góður dagur, sól og gott veður. Ég var löngu búin að ákveða að taka mér tölvufrí í dag (þó ég sé aðeins að svindla) Mætti með sonum mínum og eiginmanni á kjörstað kl. 9:30 í morgun og allir kusu rétt:-)
Eftir morgungöngu með Platon tókum við garðinn í gegn, slógum grasið, reittum arfa og bárum á garðhúsgögnin. Frábært að ná þessu öllu og meira að segja smá sólbaði líka. Nú erum við að drífa okkur í kosningapartý, vonandi verður þetta skemmtilegt kvöld og ef úrslitin verða hagstæð kíkjum við kannski á réttan skemmtistað :-)

2003-05-08T16:09:00.000Z

Í gær kláraði ég að lesa yfir og láta lesa yfir vefinn um Háaleitishverfið, það er reyndar ein síða sem er enn að þvælast fyrir mér þ.e. fyrirtækin en ástæðan er að mig langar að gera stutta vefleiðangra eða kynningar um hvert þeirra en það tekur bara of langan tíma. Ég hef líka verið að velta fyrir mér að láta nemendur vinna smá verkefni um hvert þeirra og setja þarna inn - en þetta verður auðvitað ekki framkvæmt fyrr en næsta vetur. Nú er bara smá vinnsla með skanna og myndavél og þá fer þetta allt að smella.

2003-05-06T09:04:00.000Z

Það er eins og bloggið birtist ekki heiman frá mér. Nú er ég í skólanum og bætti inn þessari línu og þá kemur líka fram það sem ég skrifaði heima í gær. Þetta er mjög duló!

2003-05-05T22:37:00.000Z

Ég verð aðeins að bæta við, það er alveg ferlega gaman í þessu jóga-spinning. Það tekur nú aldeilis á að hjóla í 30 - 40 mín og gera æfinga á meðan en aldrei þessu vant er ekki leiðinlegt í leikfimi, engin gargandi tónlist eða tryllingslegar æfingar. Þarna er skemmtileg, hress kannski dálítið gamaldags tónlist, stillt þannig að maður heyrir í kennaranum og eftir hálftíma á hjólinu er farið í sal og þar gerðum við góðar teygjuæfingar í hálftíma, mér leið eins og manneskju eftir tímann.
Þetta hentar mér vel núna enda er ég búin að kaupa mér viku hjólaferð í Frakklandi í sumar. Við ætlum að fara saman 7 vinkonur - gáfum okkur það í fimmtugsafmælisgjöf.

En ég hef áhyggjur af blogginu, það er ekki að birtast sem ég skrifa og meira að segja í blogger sé ég ekki nema hluta af því sem ég hef gert og ekki það nýjasta fyrr en ég er búin að stilla á show last 10 posts.

2003-05-05T17:56:00.000Z

Úf það er svo kalt úti, fjölæru vorblómin eru öll löggst á hliðina og páskaliljur og túlípanar líka. Þetta er synd.
Nú er ég búin að leggja mig, er á leiðinni í jóga og hef svo allt kvöldið til þess að koma þjóðsögunni inn, þetta er reyndar ekki þjóðsaga heldur huldumannssaga sem gerðist á síðustu öld:-) Meira um það síðar.

2003-05-04T12:11:00.000Z

Ég var ánægð með mig í gær, vann alveg helling við Háaleitisvefinn, náði gagnlegu símtali við Ingibjörgu Tönsberg svo þetta var fínt. Um fimmleitið í gær fór ég suður í Keflavík og endaði á balli í Stapanum!!! og þvílíkt fjör. Ástæðan var 30 ára útskrifarafmæli úr Kennó (vaá hvað tíminn líður). Bekkurinn minn Bjé bekkurinn hittist heima hjá einum úr hópnum Gunna Jóns, skólastjóra í Heiðarskóla. Þar áttum við mjög skemmtilega stund en fórum svo í Stapann (þangað druslaðist ég reyndar aldrei á ball í gamla daga enda þóttu mér Hljómar alltaf hundleiðinlegir) maturinn var mjög góður og Mummi sem sá um tónlistina vissi nákvæmlega fyrir hvaða hóp hann var að spila. Nú ætla ég að fara í jóga hjá Jónínu Ben og fara síðan niður á Borgarbókarsafn að leita mér heimilda. Var einhver að tala um að þetta verkefni ætti að taka 40 klst. í vinnslu........

2003-05-01T17:53:00.000Z

Nú er ég komin með slóðina að tölvupóstinum hans Sigurðar Fjalars. Á þessari slóð http://ut.fb.is/tolvuposturinn.asp er hægt að lesa öll útkomin rit og gerast áskrifandi.

Mikið leyst mér vel á verkefnið sem sonur hennar Kristínar Steinars, tók þátt í. Það er svo gaman að heyra af því sem er að gerast í öðrum skólum. Það er ótrúlegt hvað þessir krakkar geta gert. Núna eru mínir nemendur í 10. bekk að gera minningabók/árbók sem þeir fá við útskrift í vor. Þeir vinna hana í publisher en ég setti leiðbeiningarnar allar út á netið. Þetta hef ég aldrei prófað áður (þetta er glæruverkefnið sem ég ætlaði að nota í staðbundnu lotunni síðast) en þó talið vanti er mjög fróðlegt að sjá hvað þeir eru sáttir við að fá upplýsingarnar á þennan hátt og tala um hvað það sé þægilet að geta haft leiðbeiningarnar opnar á meðan þeir eru að vinna.

2003-04-29T23:07:00.000Z

Ég er búin að sitja við og lesa Tölvupóstinn sem Sigurður Fjalar gefur út. Þetta er frábært vefrit sem ég held að við ættlum öll að vera áskrifendur að.
Þetta er svo vel uppsett og aðgengilegt og alveg fullt af gagnlegum upplýsingum. Mæli með því!!
Annars sátum við Sigga í dag og fórum yfir skólalokin. Eins og venjulega er maður alltaf jafn hissa á því hvað það eru fáir tímar eftir til vors, ég á eftir að fá nemendur mína úr 10. bekk í einn tíma, það eru samræmd próf og skólapróf og ....... Svona er þetta alltaf, ég gæti alveg hugsað mér að hafa þá marga tíma í viðbót:-)

2003-04-27T13:36:00.000Z

Nú er ég að reyna að vinna við verkefnið mitt um Háaleitishverfið. Ég sat allan daginn í gær fyrir framan tölvuna með algjöra ritstíflu. Þetta var ótrúlegt, ég lagði kapal, skoðaði netið, las bloggið og eldri kennsluvefi, en hjá mér kviknað ekkert. Það eina sem ég gerði var að hanna forsíðuna svona nokkurn vegin. Jæja, það eru ekki alltaf jólin. Ég hringdi líka í nokkra aðila sem ég var að vona að hefðu einhverjar upplýsingar og það skilaði smá árangri.
Í morgun fór ég svo í langan göngutúr með Platon til þess að hressa hugann, en þegar ég kom til baka lenti ég í því að vera handlangari fyrir bónda minn sem var að klæða loftið undir svölunum. Vonandi get ég gert eitthvað í kvöld því nú er ég að fara í fermingarveislu.
Ég hef aðeins verið að senda nokkrar línur inn á Webordið, það ber engan árangur. Ég held að það væri gott í framtíðinni að hafa það aðeins virkar - við (nemendur og kennarar) getum klárlega hjálpað hvort öðru með ýmis tæknilega atriði. Þegar maður bloggar er þetta mest allt eintal, en webordið býður upp á meira. En mikið er það annars gaman þegar einhver skrifar inn á bloggið hjá manni:-) Takk fyrir það.

2003-04-24T23:42:00.000Z

Gleðilegt sumar. Alveg er þetta búið að vera dásamlegt veður í dag, ég fór í góðan göngutúr um Elliðaárdalinn í morgun svona til þess að finna lyktina af gróðrinum sem er allur að springa út. Eftir það var ég virkilega duglega við tölvuna, setti fram kennsluáætlun við FrontPage námskeiðið og stundaskrá.

Nú fer að líða að því að ég geti einbeitt mér að lokaverkefninu. Það er reyndar enn á gerjunarstigi en þannig finnst mér best að vinna, ég er búin að taka ljósmyndir sem ég ætla að nota, safna að mér bókum, og spjalla við fólk.

Ég hef reyndar smá áhyggjur að PowerPoint sýningunni minn, ég held ég hafi ekki réttu tækin til þess að ljúka þessu, kannski ég láti bara hljóð duga - enda sé ég svo sem ekki að það mundi bæta showið að hafa mynd af mér líka;-) En ég ætla að læra þetta þó það verði ekki fyrr en í sumar, ég er nefnilega komin með hugmyndir að verkefnum sem ég ætla að láta nemendur mína vinna næsta vetur.

Nú ætla ég að reyna að undirbúa mig aðeins undir kennsluna á morgun, ég ætla að taka smá excel með 9. bekk. Þetta er eiginlega eina forritið sem veldur mér alltaf áhyggjum, mér finnst ég aldrei finna nógu skemmtileg verkefni sem vekja áhuga svona ungra nemenda. Sjálf lærði ég excel bara eftir þörfum enda er þetta mjög praktískt forrit, en krakkarnir sjá það ekki sömu augum. Mikið væri gaman að heyra hvort einhver úr hópnum eigi skemmtilegar hugmyndir í excel.

2003-04-20T12:08:00.000Z

Þá er vandamálið með layerana úr sögunni, ég þurfti bara að "loka auganu" ;-)
Nú er ég langt komin með kennsluefnið og er búin að smella því út á vefinn ég ætla þó að reyna að setja inn efnisyfirlit með bookmarks, ætli það gangi milli mismunandi vefsíðna?

2003-04-19T16:04:00.000Z

Þetta mjakast nú aðeins, nú á ég í erfiðleikum með Layers sem hanga inni á síðunni minni en eiga bara að sjást þegar bendillinn fer yfir ákveðna staði. Ég verð eitthvað að skoða þetta betur. Annars er veðrið svo freistandi, ég held ég fari bara aðeins út að hjóla, í gær var svo mikið rok þegar ég hjólaði út í Nauthólsvík að ég rann ekki einu sinni niður brekkur það var frekar erfitt;-)

2003-04-16T01:02:00.000Z

Sá á blogginu hennar Siggu að hún er að fara norður, en ég hef nóg annað að gera.
---- Hlakka til að hitta þig Sigga mín, eftir páska:-)----

2003-04-16T01:01:00.000Z

Já, nú er ég komin heim. Það er nú alltaf gott. Ég hafði hugsað mér að blogga smá frá Feneyjum en þegar ég ætlaði að fara inn á bloggið í annað sinn komst ég ekkert áfram nema borga 50 dollara fyrst. Ætli fleiri hafi lent í þessu? Annars hafði ég það mjög gott, þrátt fyrir misjafnt veður, en það skiptir nú svo miklu máli þegar maður er á ferðalagi. Eftir að hafa skoðað Feneyjar vel og vanlega (þá á ég við langt útfyrir Markúsartorgið) tókum við hjónin okkur bílaleigubíl og keyrðum til Padua, sem er mjög falleg borg í nágrenninu en þar er margt að skoða, síðan fórum við um sveitirnar og upp í fjöllin þar sem við þvældumst á milli lítilla þorpa sem mörg hver eru fulla af ýmiskonar minjum. Við vorum svo heppin að það var gott veður þessa þrjá daga sem við vorum á þvælingi.
Nú er bara að hefjast handa, ég hlakka til að heyra frá Siggu G. og læra hljóð og myndsettninguna hjá henni.

2003-04-09T12:43:00.000Z

Godan daginn. Sit her a huggulegu netkakaffi i Feneyjum. Uti er sol en frekar kalt. Ferdin i gaer gekk nokkud vel fyrir untan ad thad var rumlega klukkutima seinkun i Keflavik og thess vegna munadi litlu ad vid misstum ad fluginu fra Amsterdam til Feneyja - en vid hlupum og nadum en toskurnar okkar nadu ekki. Thaer komu tho i morgun svo vid vorum nu frekar fegin. Nu nota eg daginn til thess ad ganga um thessa aevintyraborg, eg hef ekki hugmynd um hvar eg er en thad er OK eg hef marga klukkutima til ad finna ut ur thvi.

2003-04-07T20:15:00.000Z

Nú er ég að fara til Feneyja á morgun, ég hef að sjálfsögðu með mér minnisbók og blýant til þess að undirbúa lokaverkefnið en ég verð tölvulaus enda á ég ekki fartölvu og það er kannski gott. Ég er nú vís til að finna mér einhvers staðar netkaffi í Feneyjum og senda línu á bloggið.
Mér finnst svo margt spennandi í boði í staðbundnu lotunni að ég er frekar spæld að missa af henni en Sigga Guðna, vinkona mín hefur lofað að kenna mér það helsta þegar ég kem heim, líklega reyni ég bara að renna í Þorlákshöfn einhvern daginn í pásafríinu til þess að læra að setja inn mynd og hljóð.

2003-04-06T19:59:00.000Z

Nú er fullkomið kæruleysi í gangi, það var stórhelgi í bridgekúbbnum við vorum í Hveragerði í sólarhring og spiluðum ótrúlega mikið. Þetta er svo skemmtilegt með smáblöndu af G&T, heitum potti, góðum mat og rauðvíni. 12 hressara dömur í hóp, einmenningskeppni með hæfilegu kæruleysi. Ég tók nokkrar myndir sem ég smellti út á heimasíðuna mína. Til skýringar þá heitir klúbburinn "Svanfríður sjálf" og eins og með allt þá er smá saga á bak við það..........

2003-04-04T00:04:00.000Z

Í gær fór ég á tónleika hjá Fóstbræðrum (samt ekki með Siggu Guðna) Þetta er frábær kór. Bróðir hennar Siggu, Þorsteinn Guðnason söng einsöng í mörgum lögum hann er alveg frábær svo er nýr maður í kórnum Stefán Helgi sem söng líka einsöng, hann er mjög góður. Þeir eru örugglega bestir!!! Hafið þið kíkt á heimasíðuna þeirra?

2003-04-02T23:04:00.000Z

Til hamingju Þórunn, þér tókst að losna við aulýsingaborðann frá Blogger (mér finnst síðan reyndar vera hálf topplaus)
Þetta kemur allt, smátt og smátt.

2003-04-01T20:52:00.000Z

Mér tókst að klára rannsóknina í dag þ.e. að athuga krakkana. Á morgun verður hún loksins send.
Ég er komin með metersháan stafla að bókum um Reykjavík, en finn næstum ekkert efni um Háaleitishverfið. Hverfið er allt of ungt (45 ára). Ég er man eftir mjög góðri sögu um álfabyggð í Síðumúla en ég finn hana ekki. Þetta er frábær saga um álfa og hænsnabú sem var í Síðumúlanum þegar ég var krakki. Ég birti hana þegar ég finn hana(ég kann hana nokkurn vegin en það er nú ekki alveg nóg þegar maður setur námsefni á vefinn) þetta er uppáhaldssagan mín þegar ég fer með nemendur í göngutúr á vorin. Ég hitt Lýð Björnsson í Kringlunni á laugardaginn og hann er alltaf sami ljúflingurinn alveg til í að hjálpa mér með heimildir svo ég get hringt í hann um leið og ég hef tíma.

2003-03-31T15:38:00.000Z

Þetta flokkast auðvitað undir hámark bjartsýninnar. Búin að vera í burtu í viku og hélt að ég gæti farið að sinna eigin málum (þ.e. rannsókninni).
Jæja, það verður að takast á morgun, ég held ég hafi náð því nauðsynlegasta í dag.

2003-03-31T08:34:00.000Z

Jæja, loksins tókst mér að laga bloggsíðuna, nú get ég aftur farið að einbeita mér að því sem máli skiptir. Ég er komin í skólann svo nú ætla ég að reyna að klára rannsóknina fyrir Sólveigu. Ég er búin að gera PowerPoint verkefnið þ.e. hin einfalda hluta. Ég hugsa mér þetta sem verkefni sem ég legg fyrir nemendur í fjarkennslu. Fínt t.d. þegar maður þarf að fara í staðbundnar lotur. Nú þarf ég að hljóðsetja sýninguna.

2003-03-30T13:21:00.000Z

Þvílíkar æfingar. Ég ætlaði að reyna að færa þessar leiðindar línur um ný skrif, neðst á bloggsíðuna en þetta eru búnar að vera margra klukkustunda pælingar, svo gengur allt svo hægt á þessu bloggi að það líða margar klukkustundir áður en maður getur séð hvort breytingar hafi tekist. Er ekki alveg eins gott að hafa bara heimasíðu sem bloggsíðu, maður getur bara sett upp eitthvað smart look á hana og skrifað sína daglegu pistla. Þar er líka hægt að stjórna útlitinu eftir eigin höfði, sett inn gestabók og spjallglugga og það besta er að maður þarf ekki að kunna neitt í html - þó það hafi verið ágætt að rifja það aðeins upp, en ég held að þeim fari fækkandi sem kunna eitthvað í html, það verða bara sérfræðinarnir sem halda því við.

2003-03-28T13:27:00.000Z

Aðal

2003-03-28T13:16:00.000Z

Þvílíkar æfingar á blogginu mínu, líklega ætti ég ekki að vera að fikta svona mikið

2003-03-27T18:44:00.000Z

Mér tókst að gera dálítið mjög flott á heimasíðunni minni. Ég fann javaskrift sem sýnir dag, dagsetningu og klukku. Cool
Ég vona bara að það virki í öðrum tölvum. Þetta virkaði ekki á FrontPage vefjunum mínum.

2003-03-27T16:42:00.000Z

Nú eru rúmir tveir klukkutímar síðan ég setti breytingar á síðuna mín að það er ekkert komið út enn. Þetta er sérstaklega leiðinlegt þegar maður er að vinna í útlitinu.

2003-03-27T14:34:00.000Z

Það er aðeins farið að rofa til, ég get alla vega horft á tölvuskjáinn og það er auðvitað merki um batnandi heilsu hjá svona tölvusjúkling eins og mér. Nú er ég meira að segja farin að huga að kennsluverkefninu. Mig langar að gera vef um Háaleitishverfið. Hann mun nýtist á nokkurra ára fresti á þemadögum í skólanum. Ég er sjálf meðal frumbyggja í hverfinu og man svo vel eftir sveitabæjum þarna, meira að segja í nokkur ár eftir að við fluttum í hverfið. Ég þarf að tala við Lýð Björnsson, hann er auðvitað algjör sögusnillingu og er líka meðal frumbyggja. Það verður spennandi að safna heimildum og byrja að vinna við þetta. Nú þarf ég bara að láta mér detta eitthvað skemmtilegt PowerPoint verkefni í hug. Reyndar eru nemendur í 10. bekk ´með svona verkefni í vinnslu þar sem þeir eiga að vera með show og texta inn á. Þetta er svona eins og að stökkva beint út í djúpu laugina, ég þekkti bara hugmyndina, benti dönskukennaranum á hana og verkefnið fór á stað. Þess vegna er ég virkilega fegin að við séum líka að fara í þessa vinnu ég verð þá hugsanlega á sama stað og krakkarnir, en það er líka fínt að læra þannig er það ekki? Tölvukennarar geta ekki alltaf verið með allar nýjungar á hreinu svona í upphafi verks, þá mundi allt gerast of hægt.

2003-03-25T14:34:00.000Z

Úff, hausinn á mér er að klofna og öndunarfærin stífluð, flensa kallast þetta víst. Ég hef ekkert komist í skólann og engar rannsóknir verða unnar þessa dagana enda skilst mér á Siggu að sama sé með börnin, þau eru meira og minna heima vegna veikinda. Ég verð bara að fá lengri frest, ég veit að Lára hefur fullan skilning á þessu enda búin með sína flensu. Nú ætla ég aftur upp í rúm að skjálfa undir sæng.

2003-03-23T15:41:00.000Z

Það var athyglisvert að lesa viðtalið við Salvöru í Mogganum í morgun og ánægjulegt að geta flokkað sig inn í þennan hóp tölvunotenda:-)
Annars fer hópurinn örugglega ört stækkandi. Ég kenndi nemendum mínum í 10. bekk á bloggið fyrir jól og þó nokkur þeirra eru að nota það. Í síðustu viku kenndi ég svo fyrsta hópnum í 9. bekk á þetta. Það er augljóst að þau vita ekkert um blogg, ekkert þeirra hafði heyrt um það talað, kannski hafa þau tekið við sér ef þau hafa lesið viðtalið.
Það var fínt í Kennó í gær, Björn er fínt kennari og tíminn opnaði ýmsa nýja glugga.
Annars er ég alveg eins og drusla, komin með einhverja flensu og hef verulegar áhyggjur af framkvæmd rannsóknarinnar fyrir Sólveigu, ég fer allavega ekki í skólann á morgun. Reyni að vera fljót að losa mig við þetta.
Ég verð nú aðeins að segja frá því að í gærkvöldi var ég boðin út að borða ásamt fleira fólki. Við fórum til Sigga Hall og hann fékk að ráða matnum og vínunum. Þetta var ótrúlegt. Maturinn var svoooooo góður og vínin ekki síðri. Það er aldeilis óhætt að mæla með þessum stað. Þetta voru 6 - 7 réttir, hver öðrum betri en það sem mér fannst best af öllu þessu góða var súpa með reyktri ýsu og með þessu bar hann fram örlítið sætt hvítvín og svo eftirrétturinn sem var heit súkkulaðikaka með vanilluís og kældu ítölsku rauðvíni. * * * * *

2003-03-20T14:47:00.000Z

Vaá, nú er aldeilis smartheit hjá mér á Blogginu, kínversk tákn í stað séríslenskra stafa.
Í dag byrjaði ég á verkefninu fyrir Sólveigu. Ég get ekki neitað því að ég var komin með hálfgerðan skriftarkrampa, maður er nánast hættur að skrifa svona mikið, en þetta er svolítið skemmtilegt. Spurningin er hvernig mér tekst að vinna úr hrafnarsparkinu;-)
En sem sagt ég sat með stelpu í 8. bekk og strák í 9. bekk. Ættli seinni hlutinn verði ekki að bíða fram yfir helgi.
Ég lærði nokkur ný trix í Fireworks í dag hjá nemanda mínum í 9. bekk, frábært að hafa svona góða nemendur. Ég lét hann kenna öllum hópnum sínum. Þetta er mjög spennandi - vonandi get ég kennt þetta næsta vetur í 10. bekk.

2003-03-16T23:16:00.000Z

Ég var að koma úr óperunni, stórkostleg sýning á Macbeth. Ég held að þetta sé einhver besta óperusýning sem ég hef séð og vitið þið hvað, vinur okkar Manfred Lemke söng hlutverk læknisins. Þeir geta ýmislegt þessir kennarar.
Annars hef ég nú líka verið að sinna náminu aðeins í dag og nú er vefurinn um mig og ut bæði kominn út á íslensku og ensku. Þá er nú bara að vinda sér í rannsóknina fyrir Sólveigu.
Það er eitt sem ég verð að læra fljótlega, það er að láta valhnappa myndast fyrir neðan aðalhnappinn eða krækjuna þegar bent er á hana. Vonandi finn ég út úr þessu á næstunni en ef einhver les þetta sem kann lausnina, þætti mér óskaplega vænt um að fá línu með leiðbeiningum.

2003-03-12T20:49:00.000Z

Nú er ég búin að koma út heimasíðu um mig og UT. Ég er nú ekki búin að þýða hana, það kemur bráðum. Þetta er búinn að vera einn af þessum ótrúlega erfiðu dögum, eilíf hlaup og reddingar enginn matartími heldur eitthvað týnt upp í sig á hlaupum (ekki gott samkvæmt heilsuátakinu sem er hjá okkur í skólanum en ég náði samt leikfimi eftir tímann með eldri borgurunum. Það gengur nokkuð vel, ég held að þeir geti allir sent tölvupóst, opnað viðhengi og í dag vorum við að æfa ´það að skrifa bréf í Word með smá útlitsbreytingum, þeim fannst skemmtilegast að setja inn myndir:-). Næsti tími er síðast tíminn þeirra en þá ætla ég að kenna þeim að panta sér flugferð á netinu. Verst að ég gat ekki gert það í dag - það var hægt að fá nettilboð til Akureyrar á 999 kr. til 16. mars.

2003-03-11T23:02:00.000Z

Ég var að koma af frábærum fundi í skólanum þar sem nemendur og foreldrar í 10. bekk voru. Þarna var fjallað um vímuvarnir og sýnd nýleg íslensk bíómynd um fíkla og fíkniefni. Hún var ótrúleg, það er ekki hægt annað en tárast yfir sögum aumingja fólksins. Það voru fulltrúar Marít samtakanna, lögreglunnar og félagsstofnunar sem stóðu fyrir fundinum. Við Fanný, námsráðgjafinn í Álftamýrarskóla, ákváðum að setja um heimasíðu um vímuvarnir á skólasíðunni. Það eru margir góðir vefir sem hægt er að benda foreldrum og börnum á.

Ég vil hvetja fólk til þess að sniðganga BodyShopp verslanirnar. Af einhverjum undarlegum ástæðum skreyta þeir glugga sína með laufblöðum sem eiga að vera af Kannabisplöntunni og skýringin er að þeir vilji vekja áhuga á hinum góðu áhrifum plöntunnar (þeir selja krem sem unnin eru úr henni). Ætli hin slæmu áhrif séu ekki margfalt meiri.

Nú ætla ég að snúa mér að verkefni 2 frá Láru, ég er pínulítið úti á rúmsjó með það eins og Þorkell, ég skil ekki alveg þessar tilvísanir í lestrarefni, fyrir utan það að ég næ ekki að lesa þetta allt og vinna úr því fyrir næst sunnudag, ætli ég hafi þetta ekki bara "my way"

2003-03-09T16:50:00.000Z

Þá er það vefleiðangurinn minn, ég er búin að sitja í allan dag og glíma, reyna að halda inni kenningum um vefleiðangra en er full efasemda. Mikið væri nú gott ef Salvör læsi hann yfir fyrir mig og send mér ábendingar. Mig langa virkilega til þess að vinna þetta rétt. I´m so alone :-)

2003-03-08T15:43:00.000Z

Fór í Kennó í dag, alltaf gott að hittast og ræða málin þó svo minna verði nú kannski úr vinnuni. Þarna var rifjuð upp þessi könnun sem við eigum að vinna fyrir Sólveigu. Hún er víst hálf eining en þegar fróðar konur lögðust í útreikninga komust þær að því að ef vinnan væri unnin samkvæmt staðli væri þetta verkefni a.m.k. ein eining.......

Ég var að klár úttekt mín á þessum tveimur fyrirlestrum frá UT-ráðstefnunni. Ég er að hugs um að smella þeim á heimasíðu, mér finnst þetta blogg eiga til að svíkja svo ég geri bara krækju hérna. Vona að Lára sé sátt við það:-)

2003-03-05T22:39:00.000Z

Er búin að sitja í allt kvöld og vinna við dönsku síðuna. Við verðum með kynningu á henni á morgun fyrir félag dönskukennara svo að ég var aðeins að fara yfir og bæta við eins og svo oft áður, svona kennsluvefur getur verið óendanlegur. Við erum alltaf að fá hugmyndir af nýju efni og það eina sem okkur skortir er tími. Núna erum við að vinna síður um traditioner og ég hef komist að ýmsu skemmtilegu um Dani, eins og t.d. þessu með "Gækkebréfin" það er alveg sér danskur siður (held ég) Er einhver sem veit betur?
Annar fór ég í skólaheimsókn í Heiðarskóla í dag. Þessi skóli er í Reykjarnesbæ og er virkilega fallegur og það var mjög vel tekið á móti okkur. Ætlunin er að Álftamýrarskóli og Heiðarskóli fari í einhversskonar samstarf (speglun). Það getur orðið skemmtilegt. Þetta virðast nokkuð ólíkir skólar og við getum örugglega lært hvert af öðru.

2003-03-02T20:36:00.000Z

Kom heim frá Akureyri í gærkvöldi. Þetta var ágætis ráðstefna en ég var dálítið svekkt á því að komast ekki í þær málstofur sem ég hafði áhuga á. Þetta var nú full takmarkaður aðgangur. Fyrir bragðið nennti ég ekki að eltast við þær og valdi mér eingöngu fyrirlestra. Mér fannst mjög áhugaverður fyrirlestur Hrafns Loftssonar og virkilegt umhugsunarefni af hverju konum fækkar svona í tölvunarfræðum. Ég held að kynning á starfinu í framhaldsskólum gæti breytt einhverju þarna um. Þetta er það sem þeir gera í verkfræðideild HÍ og það hefur skilað mikilli fjölgun nemenda og ekki síst stúlkna.
Ég hlustaði (algjörlega óvart) á fyrirlestur um starfsemina á Iðavöllum en það er leikskóli fyrir norðan, mjög áhugaverð starfsemi sem þar fer fram en ég hafði nú persónulega ekki mikið gagn af því sem þar var til umræðu nema það er auðvitað skemmtilegt að heyra af öðrum skólastigum.
Á laugardaginn hlustaði ég fyrst á þær stöllur Ingibjörgu og Kristínu Steinars. Þetta var mjög áhugavert erindi hjá þeim og það verður athyglisvert að fylgjast með framhaldinu. Eftir hádegið hlustaði ég síðan á kynningu Björns á Evrópska skólanetinu og Odin - norræna skólanetinu (það var þó heldur stutt í annan endann).
Umfjöllun Ásrúnar um vefsíður var góð en ég hefði frekar viljað heyra umfjöllun um kennsluvefi því það er það umhverfi sem ég er að velta fyrir mér, mér er nokk sama um fyrirtækjavefi og nýtingu þeirra á auglýsingaplássi. Ég gerði heiðarlega tilraun til þess að hlusta á þennan sænska fyrirlesara - en ég gafst upp. Það var ekki nokkur leið að fylgja manninum eftir. Hver skyldi hafa ákveðið að bjóða upp á þennan fyrirlesara með tilheyrandi kostnaði?
Ég hef nefnilega aðeins verið að velta fyrir mér fyrirkomulaginu á þessari ráðstefnu. Ég hvatti samkennara minn til þess að sækja um að halda fyrirlestur þarna. Það er kona sem er mjög virk í því að nota tölvur við tungumálakennslu. Hún fékk jákvætt svar og var beðin um að koma en þegar hún spurði um greiðslur vegna fyrirlestursins var svarið það að eingöngu yrði greitt flugfarið norður og ekki króna í viðbót, ekki leigubíll frá flugvellinum, ekki matur á meðan á dvölinni stæði sem sagt hún þurfti nánast að borga með sér. Hún afþakkaði boðið og ég var henni algjörlega sammála. Hvenær ætla kennarar að vakna til meðvitunar um það að það ber að greiða fyrir alla vinnu. Við getum ekki alltaf tekið þátt bara af því það er svo skemmtilegt. Við vitum öll að undirbúningur fyrir 45 mínútna fyrirlestur er þó nokkuð langur. Hjá kennurum fer sá undirbúningur ekki fram í vinnunni heldur á kvöldin og um helgar. Við kennarar verðum að læra að meta tíma okkar til jafns við aðrar stéttir.

2003-02-26T19:31:00.000Z

Vaá, það er ekki á hverjum degi sem það er flaggað fyrir manni:-)
Skrítið þetta blogg ég skrifaði smá pistil í dag en hann kemur hvergi fram!!!
Ég var nefnilega svo ánægð með að vera búin að ákveða vefleiðangur, þó svo ég geti ekki hafist handa fyrr en eftir UTleiðangur minn.
Ég ætla að tengja hann námsefni í lífsleikni í 9. og 10. bekk. Það eru vímuvarnir og reykleysi. Ég er komin með heilt fjall af "björgum" í formi bóka, bæklinga og vefslóða. Það verður spennandi að byrja.

2003-02-23T22:26:00.000Z

Nú er ég búin að vera að vinna í DW í allan dag, það var fínt. Ég fann út hvernig ég bý til rammasíðu og hvernig ég stilli targetið í krækjunum :-) Eða eins og góð kona sagði "kemst þó hægt fari". Ætli það sé enginn teljari í DW? Ég er ekki mjög spennt fyrir fleiri ókeypis fídusum inn á síðuna mína.
Annars leyfði ég mér að skreppa í bíó á miðjum degi og sá Chicago - frábær mynd. Ég sá söngleikinn á Brodway fyrir nokkrum árum en bíómyndinn er miklu skemmtilegri. Mæli með henni.

2003-02-22T13:24:00.000Z

Það er nú ekki allt eins gott og það sýnist. Ég var að kíkja í mína eigin gestabók og viti menn þarna er auðvitað auglýsingar eins og alls staðar á netinu en ein af þeim var beint inn á klámsíður - ekki gott mál:-( einkum og sér í lagi þar sem það virðist vera helsta áhyggjumál íslenskar foreldra að börn þeirra komist inn á slíkar síður. Mér finnst aftur á móti tímasóuninn og félagsleg einangrun mun meira áhyggjumál. Verst finnst mér þó að eiga við foreldra sem trúa því að börnin þeirra séu svo óskaplega góð á tölvur en síðan kemur í ljós að þau eru bara óskaplega góð í tölvuleikjum - sem er allt annað mál.
Ég ætla nú samt ekki að helnda gestabókinn strax út, ég ætla að athuga hvort að nýju siðgæðissýjurnar hjá FMR loki á þessar síður.

2003-02-19T23:32:00.000Z

Nú segi ég eins og börnin "Yes" mér tókst að setja venjulega gestabók inn á bloggsíðuna mína og breyta uppsettningunni á henni. Mér tókst líka að búa til templet í dreamweaver en ég er ekki alveg ánægð með það. Það er eins og annað í Dreamweaver, mér finnst ég ekki vera örugg og þetta sé óttarleg káf hjá mér. Mig vantar virkilega betri leiðbeiningar. Ég mæli ekki með bókinni - á eigin spýtur. Það er eins og þýðandinn kunni ekki á forritið.
En að öðrum málum, ég fékk alveg frábæran hóp eldri borgara í dag og ekki voru aðstoðarkennararnir verri. Nú gat ég mannað þetta svo vel að það var maður á mann og hópurinn virtist smella saman. Á þessum þremur árum sem ég hef haldið þessi námskeið hafa aðstæður þeirra eldri breyst ótrúlega mikið. Nú eru allir tengdir heima og flestir hafa aðeins þvælst um á netinu.

2003-02-18T23:12:00.000Z

Jæja, alltaf mjakast maður örlítið. Var í smá tilraunum í Dreamweaver í kvöld (þó svo engar breytingar sjáist á heimasíðunni;-)
Annars var ég að undirbúa námskeið fyrir eldri borgara, sem hefst hjá mér á morgun. Þetta eru mjög elskuleg námskeið þar sem nemendur úr 9. og 10. bekk eru aðstoðarkennarar eldri borgaranna. Það skapast oft mjög gott samband á milli unglinganna og þeirra eldri og ég hef oftar en einu sinni orðið vitni að því að þau skiptast á litlum gjöfum í lokin og jafnvel er boðið heim í kaffi. Við erum aðalega að kenna á internetið og póstinn. Allflestir eiga orðið börn eða barnabörn útlöndum sem þeir vilja vera í bréfasamskiptum við. Vonandi verður þetta góður hópur sem ég fæ á morgun.

2003-02-17T23:52:00.000Z

Mikið er ég fegin að sjá að við erum komin með ákveðin stað fyrir spurningar og svör. Ég er viss um að þarna á eftir að byggjast upp góður banki. Ég kíkti inn áðan en það var nú ekkert komið en það verður líklega ekki lengi.

2003-02-16T14:22:00.000Z

Jæja, það var nóg að gera í gær. Ég dreif mig í skólann kl. 10 og var að vona að ég næði smá af fyrirlestri Ólafar, en því miður gat ég ekki verið nema 45 mínútur og hún var varla byrjuð þegar ég fór (vona enn og aftur að Sigga hafi tekið glósur) Ég þurfti að vera á sýningunni í Ráðhúsinu "Skóli á nýrri öld". Það gekk ágætlega. Ég fór þaðan upp úr eitt og þá fór ég austur í Hveragerði, mér var nú hugsað til Siggu á leiðinni, alveg blinda þokka, grenjandi rigning og hávaða rok. Úff, ég vona að hún þurfi ekki oft að keyra í svona veðri úr Þorlákshöfn. Annars hafði ég það mjög huggulegt í Hveragerði, við vorum í Frost of funa (nýja húsinu) það var alveg meiri háttar, það var engin tölva með - bara spil og við spiluðum bridge fram á miðja nótt. Mikið er gott að gera stundum eitthvað annað:-)
Nú er ég að fara aftur niður í Ráðhús þar sem ég þarf að vera til 6 og taka þá sýningun niður, vonandi get ég unnið eitthvað í heiamsíðunni í kvöld. Ég hef verið að melta með mér persónulegu síðuna og líka smá kennsluefni.

2003-02-11T23:44:00.000Z

Þakka þér fyrir kveðjuna Salvör. Ég reyni bara eins og ég get og svo hjálpar Sigga Guðna mér.
Ég hef verið að velta fyrir mér hvenær notar maður lög (layers) og hvenær töflur. Í Front Page nota ég alltaf töflur og er þess vegna vön því en þegar ég er að vinna með lög fara þau á flakk um allan skjá algjörlega óháð því sem ég vil. Á ég að setja lög inn í töflur? Það er verkefni í bókinni á eigin spýtur þar sem maður á að búa til 10 lög og raða þeim svo saman - en vá þið hefiðuð átt að sjá skjáinn hjá mér.
Annars hef ég verið í allan dag að fara yfir heimasíðu Álftamýrarskóla. Hún verður framlag skólans til sýningarinnar Skóli á nýrri öld, við ætlum að sýna síðuna sem slíka og kynna gagnsemi þess að hafa góða heimasíðu, við ætlum að kynna "Gallery Álft" en þangað setjum við inn kynningar á myndlistarverkum nemenda, en við skólann starfar frábær myndlistarkennari Margrét Auðuns og henni tekst að galdra fram ótúlegustu hluti hjá nemendum. Síðast en ekki síst verður kynntu dönskuvefurinn minn og Ernu Jessen. Ég held að það sé mjög öflugur vefur, fullur að verkefnum fyrir nemendur og áhugaverðu efni. Ef grant er skoðað sjást áhrif námsins okkar á nýrri síðunum því ég hef verið að æfa mig í því að gera borða í Fireworks.

2003-02-09T10:46:00.000Z

Ég er svo ótrúlega svekt yfir að hafa misst af tímanum hjá Birni í gær. Lá eins og klessa heima með ælupest og útilokað að horfa á tölvuskjá.. Vonandi kemur Björn aftur. Nú sit ég bara með bók og ætla að fara í gegnum einn kafla í Dreamweaver. Ég held ég reyni við gagnvirkar síður.

2003-02-05T22:36:00.000Z

Það er svo slæmt þegar maður er að gera alls konar æfingar í blogginu, sérstaklega HTLM, og það líður svo ótrúlega langur tími þar til síðan endurhleður sig, F5 hefur því miður ekkert að segja - og þá fer ég að skrifa svona bull til þess að geta fylgst með.........

2003-02-05T21:48:00.000Z

Í dag hef ég haft í svo mörgu að snúast að ég hef ekki átt neitt við eldfærin. Okkur Siggu var boðið í algjört dekur í Planet Reykjavík, það var frábært, nudd og heit böð, andlitsmaski og fleira. Maður ætti kannski að splæsa svona dekri á sig öðru hvor! Í kvöld er svo búin að vera alveg á fullu, vegna þess að í fyrra málið ætla ég - þ.e. sonur minn að halda 30 unglinga morgunpartý. Það er nefnilega "Nemódagurinn" á morgun í Versló. Ég hef nú haldið svona morgunpartý nokkrum sinum með eldri börnunum mínum og mikið er ég fegin að sjá hvað þessir unglingar í dag eru miklu heilbrigðari en jafnaldrar mínir voru á sama aldir. ;-)

2003-02-04T18:03:00.000Z

Nú þarf ég að fylgjast með uppfærslunni

2003-02-04T17:50:00.000Z

Af því ég er nú svo mikið fyrir hreina orku og bjó til vefrallý um Landsvirkjun langar mig til þess að benda fólki á bráðskemmtilegan vef sem danska orkufyrirtækið NESA hefur látið útbúa.

2003-02-04T17:25:00.000Z

Mikið var gaman að kíkja á síðuna áðan og fá kveðjur frá nokkrum samverkamönnum. Það er skemmtilegt að hafa svona glugga:-)
Nú ætla ég virkilega að reyna við Fireworks, það eru endalaust sömu hlutirnir að þvælast fyrir mér, vonandi getur bókin góða sem ég keypti í bóksölu stúdenta leyst úr einhverjum vandamálum mínu. Ég var t.d. að búa til borða þar sem ég ætlaði að hafa bakgrunninn glærar, þ.e. ég ætlaði bara að nýta mér þessa flottu stafi sem hægt er að útbúa í FW en viti menn, borðinn kemur alltaf með svörtum bakgrunni........ Ég botna ekkert í þessu.

2003-02-02T19:15:00.000Z

Verst hvað það gengur oft illa að koma breytingum út á bloggið, ég er búin að ýta tuttugu sinnum á F5 en ekkert gerist.

2003-02-02T19:07:00.000Z

Smá tilraunir með templetið í blogginu. Það er verst að ég get ekki notað íslenska stafi.
Annars er ég búin að vera að þvælast í Fireworks í dag. Því miður man ég ekki alveg allt sem ég lærði í gær, en það verður spennandi að fara næsta laugardag.

2003-01-30T12:16:00.000Z

Næsta stóra mál - Fireworks. Skelfing hefði ég viljað fá lengri tíma hjá Birni. Ég á t.d. í mestu vandræðum með að setja myndir í borða fyrir utan það að ég hef ekki hugmynd um hvernig ég nota þetta forrrit til fleiri hluta. Ég ætla að fara í bóksölu stúdenta á eftir og gá hvort ég finni einhverjar bækur.

2003-01-29T00:55:00.000Z

Jæja, nú hef ég unnið stóra sigra. Búin að koma út heimasíðu og búin að búa til vefrallý.

Er ekki dálítið töff að vera með rallý um vef Landsvirkjunar á þessum tímum þegar börn og málleysingjar halda að þar séu menn og konur með horn og hala. En, kannski eru tvær hliðar á þessu máli eins og svo mörgum öðrum - eða er einhver sem vill hverfa aftur til þess tíma þegar höfðum ekkert rafmagn. Ekki veit ég hvar við tölvunördar værum stödd þá:-)

2003-01-26T16:57:00.000Z

Ég verð nú að segja að mér finnst þetta blogg ekki alltaf jafn skemmtilegt, núna virkar síðan mín ekki en í gær var hún fín, svona fyrir utan það að mér er ekki nokkur leið að losna við auglýsingarnar. Ætli ég verði ekki bara að borga aftur.

2003-01-26T16:55:00.000Z

Í gær fór allur dagurinn hjá mér í það að uppfæra tölvuna mína í XP og þvílíkur munur. Í dag er ég svo búin að sitja við og hlaða inn forritum og reyna að finna adressubókina og favorits aftur. Mér gegnur það illa en þá er bara að byggja nýjan grunn og nota tækifærið og taka til - það er líka gott. Vonandi fer ég að heyra frá Víglundi vegna forritana,

2003-01-23T18:38:00.000Z

Ég heiti Þórunn Traustadóttir og er deildarstjóri og kennari í tölvu og upplýsingatækni í Álftamýrarskóla. Ég er búin að starfa þar síðan 1975 (og reiknaðu nú). Lengst af var ég almennur bekkjarkennari en þegar ég eignaðist fyrstu tölvuna mína 1987 kviknaði áhugi minn á þessari tækni og ég hef kennt á tölvur eins lengi og elstu menn muna eða síðan ´90. Já, það hefur margt breyst síðan þá, ýmsum fannst það t.d alveg fáránleg peningaeyðsla þegar ég bað um litaskjái. Það voru keyptar 5 tölvur í skólann, þeim troðið inn í gluggalaust herbergi sem var 6 - 7 fermetrar og þar kenndi ég börnum WordPerfect og Mauramál. Ég fékk líka að kaupa 2 - 3 önnur kennsluforrit og einn nálaprentara. Þetta var valgrein í 10. bekk og mér fannst þetta fínt.

Ég barðist í því í tvö til þrjú ár að fá eina símalínu svo ég gæti tengst Ísmennt og Pétri á Kópaskeri. Þið trúið ekki hvað það var gaman þegar það loksins gekk og ég hellti mér út í alls konar samskiptaverkefni innanlands og utan með heilu bekkina og eina nettengda tölvu.

Nú eru u.þ.b. 80 tölvur í skólanum allar nettengdar, prentarar, skanni, stafrænar myndavélar, skjávarpar o.fl. o.fl. en okkur vantar svoooo mikið fleiri tölvur, fartölvuver, þráðlausar tengingar og helling af jaðartækjum!

S.l. vetur var ég í námsorlofi og var þá í tölvukennaradeildinni í Rafiðnaðarskólanum. Þar sátum við saman 11 í hóp og höfðum það alveg ótrúlega gott. Auðvitað var stundum erfitt í skólanum en hópurinn var svo frábær að það var ekki hægtr að leyfa sér að vera veikur því það var svo gaman að vera í skólanum. Þar kynntist ég m.a. henni Siggu Guðna. sem tók þessa mynd af mér (maður verður að vera meðvitaður um höfundarréttinn) en núna kennir hún með mér og er hér í framhaldsdeildinni.

Annað sem ég hef um sjálfa mig að segja er það að ég á yndislegan eiginmann Stefán Má og þrjú börn Trausta 18 ára, Árna Frey 22 ára og Lilju Björk 25 ára, ekki má ég gleyma hundinum Platon sem er fjögura ára enskur springer og mikil heimilisprýði Stuttu fyrir jól varð ég þeirrar gæfu aðnjótandi að verða amma því þá eignaðist ég dótturdóttur sem er algjör gullmoli. Í frístundum mínum finnst mér afskaplega gaman að spila bridge en við erum með bridgeklúbb í skólanum og hittumst annan hvern mánudag. Þess utan spilum við hjónin þegar tækifæri gefast. Við ferðumst mikið, reynum að skeppa í bíó sem oftast og spilum stundum golf á sumrin.

2003-01-23T00:13:00.000Z

´Jæja, þetta smá mjakast og draumurinn verður aðeins skýrari í dag en í gær. Líklega get ég farið að vefa að einhverju viti um helgina. Vonandi förum við að heyra eitthvað frá Víglundi um nýjustu útgáfuna, það verður spennandi að fá hana inn.

2003-01-21T17:48:00.000Z

Nú eru einhver smá vandræði, það fer ekkert út á bloggið.

2003-01-21T17:37:00.000Z

Hér er mynd af litla barnabarninu mínu. Hún fæddist 15. desember og heitir Andrea Sólveig. Afa hennar og ömmu finnst að annað eins undur hafi varla átt sér stað áður :-) Ég vef og vef fyrir hana en prjóna ekkert eins og ömmur gerðu í mínu ungdæmi.

2003-01-21T17:25:00.000Z

Þetta er búinn að vera einn af þessum annarsömu dögum, engin friður til þess að setjast niður og láta sig dreyma :-)
Ég ætla samt að setja hér inn slóðina að Álftamýrarskóla. Ég á nú ýmsa fleiri vefi en ég ætla fyrst að sjá hvernig þessi slóð virkar. Mig langar til þess að geta sett krækjur vinstra megin á bloggsíðunni. Hvernig ætli maður fari að því?

2003-01-21T00:13:00.000Z

Þetta er ótrúlegt, mér tókst að eyða öllu út af blogginu mínu, ég sem búin að vera í slíku trúnaðarsambandi við Mr. Blogger. Segja frá öllum mínum önnum undanfarna daga og barningi mínum við Dreamweaver. Ég verð nú að játa að margt er sniðugt í þessu forriti en ég er nú ekki alveg tilbúin að yfirgefa mitt góða FrontPage fyrir þessa nýjung. Bill Gates er svo sniðugur þegar kemur að stuðningi við hans eigin forrit, eins og þetta með My web það er svo einfalt, núna er ég alveg ótrúlega óörugg um það hvar ég á að vista. Hvernig raðast nýjar síður og þarf ekki að útbúa nýja möppu í hvert sinn sem maður útbýr nýjan vef. En ég er þó búin að komast að því að fyrsta síðan verður að heita index.htm eins og í FP. Mér finnst flott hvernig hægt er að stilla myndir og hnappa undir hnöppum er smart, það verður gaman að vinna í Fireworks með slíka hluti, en fyrst ætla ég að berjast í gegn um Drauminn.